الملاقه وانواعها

بسم الله الرحمن الرحيم
طبعا من نهايه التسعينات بدت تظهر في الكويت ظاهره غريبه ((الملاقه)) حيث قام الناس يلعبون بالالفاظ و يقولون اشياء مالها معنى ولكن تضحك .. هذي الاشياء انسميها الحين الملاقه .. و طبعا اختلف العلماء بالديوانيه على اللفظ الصحيح لهذه الكلمه .. فمايدرون شنو ايسمونها .. ملاقه ام ملاغه .. ذلك بحكم انه المجتمع الكويتي يقلب الحرفين هذيل


المهم يشرفني ان اكتب هذا الموضوع .. كوني اول من تطرق لهذا الموضوع من الناحيه العلميه عالميا .. راح اتكلم ان شاءالله عن انواع الملاقه و كل نوع ان شاءالله راح اوضحه من خلال التعريف و الامثله


انواع الملاقه كالآتي ::


اولا= الملاقه المعنيه او الموضوعيه ::


تقوم هذه الملاقه اساسا على العبث بمعنى الكلمات .. او بموضوع الحديث .. حيث يقوم المملق بهذا النوع بالتعليق على الكلمه المراد التمليق عليها بكلمه لها صله و تتعلق بالكلمه المملق عليها .. طبعا يمتاز المليق بهذا النوع بالاسلوب الثقيل .. فيتبع كل تمليقه بضحكه سخيفه.. ادري محد فهم عشان جذي بوضحلكم بالامثله الآتيه ::


- هندي : ' لا ما يسير بابا .. انا ما يبي يوستوغول .. كلاس '
-المعزب : ' كلاس وله دولكه '
-------------------------------------------------
حمود : ' هلا عزوز شلونك ان شاء الله زين
خلود : ' زين ولا وطنية '
-------------------------------------------------
-الام : 'اووووووو تره ذبحتيني .. بس عاااد '
-الخدامه : ' عاد ولا ثمود '
------------------------------------------------
حمود : تصدق امس دش علينا واحد غريب
عبود : ' دش ولا ستلايت '
-----------------------------------------------
بو جسوم : ' اقول العب عدل لا اقط الي بيدي
بو نوره : ' قط ولا جلب '
----------------------------------------------
وائل : انت شسمك
فيصل : انا فيصل
وائل : ' فيصل ولا سابليه
----------------------------------------------
حامد : انت تشتغل ببنك الأهلي '
صالح : 'لا ببنك الزمالك '





ثانيا=الملاقه الحرفيه::


تهدف هذه الملاقه الا العبث بالحروف .. حيث لا يكون للتمليقه اي معنى ولكن تشترك بالكلمه المراد التعليق عليها ببعض الحروف .. و يميز المليق في هذا النوع كونه سريع البديهه .. و ملقوف .. هم ما فهمتو ما ايصير ..اوضحلكم اياها بالامثله الآتيه ::


-صاحب الديوانيه : ' هلا حجي شلونك مشاري '
-مشاري : ' مشاري ولا بايع ' يعني مشاري اهو شال حرف الميم صارت شاري !!
-----------------------------------------------------
-المدرس : كتبو هالمعلومات راح تفيدكم ؟
- الطالب : ' معلوماااات و لا توفى '
-----------------------------------------------------
جبور : ' اووو كا مصفط اصفط بسرعة '
سلوم : ' لا وايد ضيج '
جبور : ' ضيج ولا ديايه '
---------------------------------------------------
عليوي : ' شنو مواصفات فارسة احلامك '
عبيد : ' ابيها شقرا و انت '
عليوي : ' ابيها شكتب '
----------------------------------------------------
الشعب : ' عاش عاش رئيسنا
الرئيس : عاش ولا باجيلا
-------------------------------------------------------
بو ياسر : انا بروح بوبيان
جمول : انا بروح بومشرف





ثالثا=الملاقه اللغويه::


يتشابه هذا النوع بالنوع السابق(الملاقه الحرفيه) ولكن يختلف في كونه يعبث باللغات .. فيربط بين اكثر من لغه في آن واحد .. و يميز المليق في هذا النوع كونه مثقف و يعرف لغات عديده .. و سريع البديهه ايضا .. اوضح ذلك بالامثله الاتيه ::


-بوسميره : ' افا عليك بس.. اتمووون يالحبيب '
-بو سارونا : ' موون ولا سان ' moon × sun
------------------------------------------------------------
-مرزوقه : 'وينك ما اتبين يالاشقر ؟؟ بطل الليت '
-فرج : ' ليت ولا هيفي ' light × heavy






الملاقة الثانوية :-


وهذا النوع لمن عنده خبره طويلة في الملاقة و تكون برد مليق ولكن بجملة طويلة وطريقة استفزازيه و يستخدمها الناس لقتل الجو عندما يكون فيه بعض الحزن و المليق هني يتميز بأنه حده مليق وعنده شهادات و خبرات سابقة بالملاقه و لكم بعض الأمثلة :-


بو سامي : ' شنو لون سيارتك '
ساميو : ' كحلي '
بو سامي : ' ما تبي اعطسلك بعد '
----------------------------------------
مصطفى : ' ابي حلاو '
بو مصطفى : ' اليوم تقول ابي حلاو باجر تقول ابي زقاير بعد '
----------------------------------------
بو انور : ' يلا دش عاد عن المصاخه '
يعقوب : ' اووو دش حط حط الجزيرة خنطالع
-----------------------------------------
واحد مضيع : ' اطلع على خط فحيحيل '
سلمان : ' لا اطلع على خط جرينيش '
واحد مضيع ' لا صج وين اطلع '
سلمان : ' اطلع على القناة الثالثة '
----------------------------------------
المدرس : شنو هذا انت طالب مدرسه
الطالب : لا انا طالب شاورما ما تبي اطلبلك
---------------------------------------------
عويس : ' اوف واخيرا راح رمضان و يا العيد '
بو عويس : اوو خله خله يدش هذي الساعه المباركة تو ما نور البيت حياااك حياااك عيد
----------------------------------------------
بو خلود : ' شوف يا ولدي يا حمود شد حيلك و انجح '
خلود : ' اي حمود شده بس شوي شوي عشان ما ينقطع '
حمود : ' الحل بالترشيد '

يا جماعه اسمحولي بس كنت بوضح الملاقه على أصولها لحد يزعل

لووووووووووووووووووووووووووول
ويع عالملاقه
تسلم ما قصرت ..

أحلا موضوع


من مواضيعك

ههههههههههههههههههههههههههه
والله موضوعك حده حلو وياريت تكثر من هالسوالف العبيطه
يعطيك العافيه

ههههههههههههههه مشكور جنك تقصدني ههههههه
انشالله اخفف من ملاقتي

يسلموووو عالموضوع الحلوو حدا عجبني

الله يسلمكم ومشكورين على ردودكم الحلوه
يعطيكم العافيه